Nintendo Switch

Nintendo Switch

Desendolcador(es)	Nintendo
Sistema operativu	sistema operativu de Nintendo Switch y FreeBSD
Tipu	modelu
Más información
Sitiu web	Web oficial
← Wii U

Nintendo Switch (ニンテンドー スイッチ Nintendō suitchi) ye la séptima consola de videoxuegos principal desenvuelta por Nintendo. Conocida nel desenvolvimientu pol so nome códigu «NX», diose a conocer n'ochobre de 2016 y foi llanzada mundialmente'l 3 de marzu de 2017.

Nintendo considera a Switch una consola híbrida. Pue utilizase como consola de sobremesa cola unidá principal inxertada nuna estación d'acoplamientu pa coneutala con una televisión. Alternativamente, pue ser estrayida de la base y utilizada de forma similar a una tableta al traviés de la so pantalla táutil LCD, o asitiada sobre una superficie gracies al so soporte integráu siendo asina visible por dellos xugadores.

La Switch utiliza dos controladores inalámbricos llamaos en xunto Joy-Con, qu'inclúin cuatro botones d'aición estándar y un joystick direccional, según sensores pa la detección de movimientu y retroalimentación táutil d'alta definición, anque s'estremen en dellos botones y carauterístiques adicionales. Dos Joy-Con puen coneutase unu a cada llau de la consola pa usase como consola portátil, coneutase al accesoriu Grip proporcionáu xunto a la consola pa usalos como un mandu más tradicional, o ser utilizaos individualmente na mano como'l mandu Wii, y d'esta forma usase con xuegos multixugador llocales.

El firmware de Switch ye compatible con xuegos en llinia al traviés de la conectividá estándar d'internet, según la conectividá ad hoc inalámbrica llocal con otres Switch. Los xuegos pa esta consola y otres aplicaciones tán disponibles como cartuchos físicos ROM de flash y como distribución dixital, y nun utilicen bloquéu de rexón. La Switch al ser de naturaleza Híbrida nun compite nel mercáu con PlayStation 4 de Sony y Xbox One de Microsoft.

El conceutu de la Switch surdió como reaición de Nintendo a dellos trimestres de perdes financieres en 2014, atribuyíes a les males ventes de la so consola anterior, la Wii U según una mayor competencia nel mercáu de los xuegos pa dispositivos móviles. Darréu, el presidente de Nintendo, Satoru Iwata, emburrió a la compañía na direición de los xuegos móviles y la creación d'un hardware totalmente nuevu.

El diseñu de la Switch ta dirixíu a una amplia demografía de xugadores de videoxuegos al traviés de les sos múltiples maneres d'usu. Nintendo optó por utilizar componentes electrónicos más estándar, como un procesador basáu na llinia Tegra de Nvidia, pa facer el desenvolvimientu de la consola más fácil pa los programadores y más compatible colos motores de xuegu esistentes. Como la Wii U tuviera dificultaes pa llograr el sofitu d'estudios esternos, dexándolo con una débil biblioteca de xuegos, Nintendo buscó'l sofitu de munchos desarrolladores y editores p'ayudar a construyir la biblioteca de xuegos de la Switch xunto colos títulos propios de Nintendo, incluyendo munchos estudios de videoxuegos independientes. Antes del llanzamientu, Nintendo anunciara que más de 100 títulos taben en desenvolvimientu por 70 desarrolladores.

Nintendo vendió más de 2.74 millones d'unidaes de la consola nel so primer mes de tar a la venta, superando la proyeición inicial de 2 millones d'unidaes que fizo la compañía, y convirtiéndose na consola que más rápido se vendió de la so historia. Les ventes de la Switch taben bien amestaes a les del videoxuegu aclamáu pola crítica The Legend of Zelda: Breath of the Wild, que se punxo a la venta'l mesmu día que la consola en tol mundu.

El Firmware actual de la consola ye'l 5.0.2, onde se resolvió un problema que causaba que los controles de movimientu respondieren incorreutamente al xugar xuegos qu'usaren esa función y resolvióse un problema que causaba que los iconos d'usuariu d'amigos encamentaos nun s'amosaren correutamente.^[1]

1. ↑ «Nintendo Switch System Updates and Change History | Nintendo Switch | Nintendo Support» (inglés). Consultáu'l 5 de mayu de 2018.